FURGONETAZ BETIKO ESTILOAN

Gure bidaia hau betiko estiloan egingo dugu, furgonetaz, autonomia osoz, lekuan lekukoa erabakiz. Talde txikia izango gara, horrek erraz mugitzeko aukera ematen digulako. Tolosatik abiatu eta Ponferradara gerturatuko gara. Handik hurbil, Las Medulas Gizateriaren Ondarea bisitatuko dugu. Ondo irabazitako ospea du Erromatar Inperioak orain 2.000 urte ustiatu zuen urre meategi honek. Ondoren, bizpahiru egun igaroko ditugu Los Ancares erreserban; Leon, Lugo eta Asturiaseko mugan dago. Paisaia basati bezain bakartia aurkituko dugu han, naturaz inguratuta. Ia 2.000 metroko mendi inguruetatik jaitsi, eta bidaiaren bigarren zatia itsas inguruan egingo dugu. Atlantiko Ozeano bazterrean daude Vigoko itsasadarra, Cies irlak eta Moaña herrixka. Bertan, abuztuaren 5etik 8ra, Ontzi Tradizionalen Topaketak ospatuko dira. Guretzat aitzakia ezin hobea bertako lagunak eta hemendik joango direnak –Albaola eta Beduolakoak adibidez– bisitatu eta itsas mundu horretan murgiltzeko. Bidaia honen prezioak barnean hartzen ditu garraioa, lotarako tokiak, furgonetako tresneria eta materialaren erabilera, eta lekuan lekuko sarrerak.