Artzaintzaren eta industriaren garrantzia

Ordizian hasi eta amaituko dugu oinezko ibilbide zirkular hau. Bertara kotxez edo trenez iritsi gaitezke. Bailara bat baino gehiago zeharkatuko dugu, eta elkarrengandik oso gertu ikusiko ditugu artzaintza eta nekazaritza, eta meatzaritza eta burdingintza. Lehen egunean, Olaberritik igaro eta gero, Idiazabalgo Gaztaren Interpretazio Zentroan, gaztak eta artzaintzak gure ingurunean duten garrantziaz jabetuko gara. Ondoren, Gipuzkoako herririk zaharrenetariko bat, Segura, ezagutu eta gero, Zerainen hartuko dugu atseden. Bigarren etapak meatzaritza izango du ardatz. Mutiloatik Legazpira iritsiko gara, eta Mirandaola bisitatuko dugu. Gaua inguruan igaroko dugu, handik ez oso urruti. Biharamunean, bideak Arantzazura eramango gaitu. Han, Gomiztegiko artzain eskolan sartu-atera egin, eta santutegia ikusiko dugu. Ospe handiko santutegia da, erromes askoren helmuga eta arte sakratu garaikidearen erakusgarri bikaina, baita euskara batuaren sorlekua ere. Arantzazun esnatu, eta Aratz-Aizkorriren bihotzera joko dugu. Urbian geldialtxitxoa egin, eta Otzaurteraino jarraituko dugu. Bosgarren etapan Gipuzkoaren eta Nafarroaren arteko mugan ibiliko gara. Etzegaraten barrena, Lizarrustira iritsiko gara. Azken etapan, Lareoko urtegiaren ertzetik, Enirioko saroira igoko gara, eta handik behera, Aralarko larreetan barrena, Goierri aldera joko dugu. Osinberdeko ur jauzia ikusi, eta Lazkao Txiki bertsolari handiaren jaiotetxetik igaroko gara. Ordizian, D`elikatuz Zentroan emango diogu amaiera gure ibilbideari. TALDEA: 7 - 14 lagun, bi gidarirekin (bidaia egiteko, gutxienez 7 lagunek eman beharko dute izena).